無論係夏天或冬天，其實一年四季都需要擦防曬，因為紫外線係唔會因季節轉變而消失架！小編今次購入咗5款市面上比較常見且受歡迎嘅防曬產品，全部防曬系數都係SPF50+，配合紫外線感應卡，為大家實測下防曬效果究竟堅唔堅！

Bioré水凝長效保濕防曬乳 50g SPF50+ PA++++ 

呢款Bioré水凝長效保濕防曬係親民價之選，主打水潤保濕，含有透明質酸、蜂王乳精華及BG保濕成分，高度保濕鎖水，令肌膚時刻水潤亮澤。採用水感凝體技術，一推即刻化成水，透明無色，質感輕薄零重感，毫無濕黏感，待乾後會形成一層保水膜，有效鎖住肌膚水分及減少因日曬造成嘅水份流失。防曬經過80分鐘浸水測試可以防水耐汗，適合戶外活動，散發清新山谷百合香，適合臉部和全身使用。

香港屈臣氏售價：HK$84.90

小編將Bioré水凝長效保濕防曬塗抹喺紫外線感應卡嘅右邊，左邊冇擦任何防曬，然後放喺陽光底下，感應卡隨即呈現兩個色，顏色越深則代表紫外線越強。左邊冇擦任何防曬，其紫外線強度為「較弱」，而右邊擦咗Bioré水凝長效保濕防曬嘅強度係「微弱」，而且兩個顏色對比顯明，可見該防曬嘅防紫外線效果頗不錯。

Curél輕透清爽防曬身體乳液 60ml SPF50+ PA+++

呢款防曬專為乾燥性敏感肌而設，成分低敏溫和，就連嬰兒都可以使用，當中蘊含「潤浸保濕Ceramide功能成分」及桉樹精華，能深入滲透至肌膚角質層，修復鎖水屏障為肌膚長效保濕，紓緩因肌膚乾燥引起嘅不適。另外有羅漢柏精華，有效穩定肌膚，防止肌膚因紫外線引致泛紅。防曬質地清爽輕透唔泛白，適用於面部及身體。

香港屈臣氏售價：HK$180

小編今次將Curél輕透清爽防曬身體乳液塗抹喺紫外線感應卡嘅右邊，左邊同樣冇擦任何防曬，然後放喺陽光底下。右邊現時紫外線強度係「微弱」，但顏色對比冇剛才咁顯明，證明Curél防曬嘅防紫外線效果較弱。

EAU THERMALE AVENE 高效清爽礦物防曬乳 40ml SPF50+

市面上大部防曬產品都係「化學性＋物理性」嘅混合型防曬，敏感肌膚嘅朋友未必啱用，尤其係極敏感肌膚或做完醫學療程嘅肌膚。Avène呢支高效清爽礦物防曬乳，係100%純物理礦物防曬，蘊含安全可靠嘅天然物理礦物防曬成份，有效直接反射紫外線，呵護脆弱受損肌膚。同時含抗敏活泉水，即時舒緩同鎮靜敏感肌。質地乾爽霧面質感，皮膚零負擔。

香港屈臣氏售價：HK$260

紫外線感應卡嘅右邊擦咗EAU THERMALE AVENE 高效清爽礦物防曬乳，然後放喺陽光底下，結果似乎與剛剛Curél防曬差唔多，紫外線強度同樣係「微弱」但偏向「較弱」程度。

ANESSA 極防水輕爽低敏UV乳液 60ml SPF50+ PA++++

ANESSA防曬出名極防水，係玩水上活動必不可少嘅防曬產品！呢款清爽低敏版無添加酒精、防腐劑PARABEN、無香料、無色素，溫和低刺激，一歲以上嘅嬰兒和小童都適用，所以敏感肌膚嘅朋友可以安心使用。ANESSA防曬採用獨家「Aqua Booster EX遇汗禦強」技術，接觸到汗水時，「遇汗禦強」成分會與汗水離子結合，於肌膚表面形成均勻嘅防禦膜；同時亦加入咗耐摩擦粉末，令配方更有效抗摩擦，不易脫落。

香港屈臣氏售價：HK$209

小編喺紫外線感應卡右邊擦咗ANESSA 極防水輕爽低敏UV乳液，然後放喺陽光底下，結果顯示紫外線強度係「微弱」，顏色對比度較AVENE防曬和Curél防曬顯明。

URIAGE 輕透防曬乳液 30ML SPF50+

呢款防曬蘊含法國活溫泉水成分，有助幫皮膚保濕，溫和防敏感。強效防曬成分能有效阻擋紫外線，防止皮膚氧化、泛紅。但小編試上手後，覺得質感太過黏膩，唔夠清爽透氣，上臉後會令皮膚造成負重感。

香港屈臣氏售價：HK$129

黎到最後一支，小編將URIAGE 輕透防曬乳液擦喺紫外線感應卡右邊，然後放喺陽光底下，結果令人感到非常意外！右邊擦咗URIAGE防曬嘅紫外線強度係「微弱」，但左右兩邊嘅顏色對比超級明顯，證明URIAGE防紫外線嘅效果比Bioré防曬更加厲害。

小編將五個防曬測試嘅紫外線感應卡平排放埋一齊，誰勝誰負即刻顯而易見！Biore防曬和Uriage防曬防禦紫外線嘅效果最好，而Anessa防曬嘅表現屬中規中矩，最後表現最差嘅係防曬係Avene和Curel。

成績排行：URIAGE > Biore > Anessa > Avene > Curel

相較之下，小編覺得Bioré水凝長效保濕防曬CP值最高，價格便宜，又能有效防禦紫外線，而且質感係五款防曬之中最清爽唔粘膩嘅！以上實測結果希望可以幫到想買防曬嘅你啦。