【小資女系列】韓國人氣小眾手袋品牌推介！

最近韓劇和韓星私服穿搭中，都見到唔少韓國小眾品牌出現。相比起各類國際名牌，近幾年討論度高嘅包款幾乎都來自小眾品牌，小編為大家精選3個小資女必買嘅韓國手袋品牌，價錢適中款式獨特唔怕撞款！

MUTEMUSE
韓國女仔幾乎人手一個MuteMuse手袋，連韓星劉仁娜、少女時代秀英都對呢個品牌愛不釋手。品牌嘅手提袋、側揹袋和肩揹袋都非常百搭，而且價錢實惠。MuteMuse將穩重嘅硬挺皮革與低調內斂嘅色彩相襯，展現不過時嘅經典時尚。MuteMuse另一特色就係可以購買唔同花紋嘅肩帶可以更換，襯出屬於你嘅個性款式。

AMUSE Bag KR₩248,000（HK$1696）

MuteMuse有兩款主打手袋款，其中一款係呢個超熱賣嘅AMUSE Bag，亦係廣告經常見到個款。方正嘅設計休閒與正式兩相宜，可以更換鏈條肩帶或印花寬肩帶去配合你嘅穿搭。少女時代秀英配搭咗一條短金鏈條，為手袋增添咗層次感。

MAGAZINE Bag Original KR₩387,000（HK$2646）

MuteMuse另外一款主打包就係呢個公事包，超大容量兼兩用方式完全切合上班族嘅需求，劉仁娜手持呢款咖啡色公事包，仲搭配咗一條豹紋斜揹袋作裝飾，盡顯霸氣幹練氣質，而且沈實嘅顏色非常適合現在秋冬使用！目前官網咖啡色已經售罄啦。劉仁娜私下仲購入咗紅色款，同樣係非常有氣場嘅顏色。

MUTEMUSE網站：mute-muse.com

HIEMS COR
最近唔少人氣韓劇都會出現HIEMS COR手袋嘅蹤影，品牌名稱源自於拉丁文，「HIEMS」係冬天嘅意思，「COR」則係熱情，品牌嘅標語係「Little Flame for your Frozen Heart」，意指希望喺冰冷嘅心中種出火苗。HIEMS COR採用優質皮革和高檔裝飾材料，呈現出舒適、感性嘅設計，多種形狀和亮麗色彩讓你嘅造型更加耀眼。

38 COOKIE CROSS BAG KR₩155,000（約HK$1,060）

近期大熱嘅《青春紀錄》第6集，女主角朴素丹都揹咗呢個牌子嘅袋。手袋仿照半圓曲奇設計，中間搭配四角形增添時尚線條感，望落獨特唔會係大眾款。100%牛皮質地，有一條可調節既長揹帶和一條單肩揹帶，共有5個顏色，小編覺得朴素丹揹嘅黑綠色和杏啡色都好靚！

25 ANGLE CROSS BAG KR₩171,000（約HK$1169）

《夫妻的世界》最美小三韓素希曾經都有揹過HIEMS COR嘅小牛皮立體多角方包，純黑色配上多角造型時尚幹練。手袋同樣係100%牛皮質地，共有四色選擇。

HIEMS COR網站：www.hiemscor.com

MARHEN.J

如果唔鍾意皮革手袋袋，可以考慮Marhen.J帆布袋。若有留意韓國潮流應該對呢個品牌手袋唔陌生。 Marhen.J嘅手袋大部分都係採用帆布材質，表層可以防潑水，款式設計簡單，再配上簡約嘅LOGO刺繡，唔會太過單調有文青風，男女都適宜用。尺寸、間隔實用，韓國明星秀智、李聖經、秀英等女星都對佢愛不釋手。

RICO系列

RICO系列最為經典，硬挺帆布材質，手提肩背兩用，內部容量大且有分層，即使放水樽都唔怕東倒西歪，袋底承托墊非常硬淨，唔會容易因太重下陷。