香港身為一個國際化嘅城市，四處都係各大品牌連鎖店，令好多本港小店漸漸消失，但與此同時，有一班年輕人堅持以本地創作，致力守護住寶貴嘅香港文化。以下5間售賣居家良品本港小店，每一間嘅產品都別具特色，店主們花盡心思透過產品宣揚本土文化及傳達其獨特嘅品牌理念，保證大家有驚喜！

diulesing

diulesing嘅產品以香港本地嘅日常生活用語作主題，風格幽默有趣，為大家介紹廣東話嘅不同用法，發掘更深層嘅本土文化。其膠紙、memo紙等都印有非常地道嘅香港日常用語，當然唔少得粗口啦。除咗文具，diulesing仲有推出港語對聯和利是封，相當有趣。「I AM HONGKONGER」嘅掛扣亦非常有特色，睇得出店主對香港人身分嘅自豪感！小編都想買返個呀。

Bujie Lite

Bujie Lite由香港設計師Charlotte創辦，喺傳統嘅針織物中加入新元素，以簡單嘅粗針織線條配搭可愛清新嘅撞色設計，創作出清新百搭嘅針織時尚配件。Bujie Lite除咗手袋，仲有散紙包、杯墊等針織小物件。

Concretology

香港渠蓋形狀嘅杯墊十分獨特，採用硅藻水泥製作，能迅速吸收水分。仿真度極高嘅渠蓋杯墊仲保留咗如今幾乎消失咗嘅「H↑K」logo，另一端係以香港人創造嘅字體「自由香港楷書」刻上「香港」二字。Concretology仲有其他非常獨特嘅生活用品，即實用又可作裝飾。

在陶

在陶主賣陶瓷手藝作品，其設計意念係給予人溫柔、恬靜嘅感覺，透過陶藝品搵到生活嘅美學以及內心嘅平靜。每一款陶藝品都獨一無二，日常所用到嘅茶杯、碗碟，連花瓶都有不同嘅陶瓷形狀和紋路呈現。在陶工作坊亦有定期開辦體驗班讓顧客親手製作屬於自己嘅陶藝品，有興趣可以去試下！

BeCandle

BeCandle係本地製作嘅高品質天然香薰蠟燭品牌，以蠟燭藝術為本，每一款香薰蠟燭都係手工製造。除咗普通蠟燭款式，BeCandle仲有推出以香港特色文化產物為造型嘅蠟燭，例如港式點心蠟燭、清湯河，頗有紀念價值。