市面買不到的奢侈月餅？2020華麗月餅禮盒合集

中秋節喺奢飾品牌界其實係一年一度嘅「包裝SHOW」，從月餅到禮盒設計都要經過數個月嘅研究，而呢啲具有代表性且充滿心思嘅精緻禮盒卻只送不賣，只會喺中秋節贈送俾品牌VIP或傳媒。小編整理咗幾個最具看點嘅月餅禮盒，一齊嚟揭開呢啲神秘禮盒嘅面紗吧！

Hermès
一向行高級奢華風格嘅Hermès，以鱷魚紋皮革配上招牌橙色製成手提收納箱作為月餅禮盒，禮盒仲有鑲鑽嘅H鎖扣，夠曬奢華！禮盒內含十個鉑金月餅，寓意十全十美，月餅上仲印有Hermès手袋嘅圖案。此外，禮盒內仲有三個橙色碟、一副刀叉、一張燈籠賀卡，由內而外散發出高貴嘅氣勢，禮盒之後可用作收納箱，非常有收藏價值！

Louis Vuitton
Louis Vuitton今年嘅月餅禮盒係音樂盒設計。轉動禮盒背面嘅按鈕，中間嘅LV吉祥物Vivienne就會隨住音樂轉動。禮盒嘅抽屜放有四個彩色月餅，寬闊嘅間隔非常適合做飾物盒！

Dior
Dior月餅禮盒以中國神話傳說「嫦娥奔月」為主題，將玉兔、鵲橋等典故融入到禮盒設計當中，仲有運用中國嘅剪紙文化，將月餅盒設計成一個戲台，背後多彩對稱圖案中國風味十足。拉開底部嘅抽屜，六個印有Dior Logo嘅月餅猶如坐喺台下看戲嘅觀眾。

Gucci
Gucci嘅月餅禮盒有種《愛麗絲夢遊仙境》嘅感覺，黃色碎星與深藍色彷如孩童充滿奇幻嘅夢境。禮盒內涵四個月餅和一個銅色兔仔，呢隻兔仔完美結合咗中西文化，將具有西式童話風嘅銅兔寓意為中國嘅玉兔，很有意思！禮盒上銅色手柄和銅兔頗有復古風味，呈現咗Gucci嘅品牌風格！