時尚品牌Louis Vuitton過往有推出過幾款瑜伽墊，不過款式一般。嚟緊嘅10月將會推出嘅Monogram花紋瑜珈墊，猶如LV手袋一樣時尚霸氣，引起唔少人期待。
瑜伽墊使用嘅Monogram印花以銀色Monogram花紋作暗花，透過光線嘅折射先會呈現出嚟，而底色係深受女性喜愛嘅奶油色。瑜伽墊仲附上傳統褐色Monogram印花皮革背帶和吊牌，背帶可以隨意拆除，拎住呢個瑜伽墊就好似拎住LV手袋咁，既時尚又尊貴！據聞該瑜伽墊嘅定價為US$2,400（約HK$18,600），你會想買嗎？
除咗瑜伽墊之外，LV 10月將推出嘅新品中，防疫面罩亦係另一焦點產品之一。呢款防疫面罩以經典嘅Monogram印花為主要裝飾，防護罩邊緣部分以細Logo紋路為主，而固定頭圍嘅部分就以較大嘅Monogram印花為主，令一個簡單嘅面罩即刻擁有豐富層次。
呢個防疫面罩唔只抵擋飛沫防疫咁簡單，仲可以遮太陽！遇到陽光嘅時候，透明膠膜會自動變色，令你防疫嘅同時仲可以防曬，一舉兩得，而且面罩覆蓋範圍大，可以全方位幫臉部防曬。目前外國媒體公佈嘅售價約為 US$961（約HK$7,500）。
LV官網仲未公佈瑜伽墊和防疫面罩嘅確實售價及開賣日期，預計於10月底會陸續於官網及指定門市上架，一齊拭目以待吧！
