近幾年秋天，大家除咗食蟹，賞芒草亦漸漸成為每年秋天必做嘅活動。香港可以賞芒嘅地方都幾多，但路線有難有易，小編以下推介6條賞芒路線，由初級至高級都有，大家把握機會趁未到冬天快啲去行山打卡啦！
昂平高原 （初級）
位於馬鞍山嘅昂平高原係熱門露營營地，亦非常適合行山新手，山路較平坦，所以有唔少人都會選擇去呢到睇芒草，由欣賞日落，至過夜看日出，景色超美。無論你係露營或野餐，都可以將美麗嘅芒草海、西貢海景與山景盡收眼底，仲可以玩埋滑翔傘！絕對係週末消遣好去處。
前往方法：
1) 坐馬鐵到恒安村站，步行到馬鞍山郊野公園起點，這段路需時約1小時
2) 坐馬鐵到恒安村站，直接乘的士到馬鞍山郊野公園起點，需時約10分鐘
3) 坐馬鐵到馬鞍山站，在新港城坐馬鞍山村巴NR84號，在郊野公園站下車。但要留意村巴的班次時間表。(NR84號班次時間：8:00, 9:00, 9:30, 10:30, 13:00, 16:00, 17:30, 19:00)
黃牛山（中級）
黃牛係新興嘅賞芒熱點之一， 位於新界沙田，和水牛山相連，行山難度屬於初級偏高，難過昂平高原些少。每年11至12月，芒草都會遍佈黃牛山下嘅山坡，美不勝收。
前往方法：
於沙田新城市廣場的巴士總站乘83K或其他交通方法到黃泥頭巴士總站。
東洋山（中級）
東洋山嘅芒草海可以用「芒草放題」來形容，難度比大東山低，而且人都少啲！於山頂可以飽覽西貢白沙灣、黃牛山及九龍飛鵝山、大老山及慈雲山一帶的景色。東洋山與黃牛山嘅難度相差無幾，雖然東洋山海拔雖然只係高 533 米，但因為路線都比較多樓梯，所以比較考體力。
前往方法：
於黃大仙乘搭村巴NR806至觀音山花園後，沿飛鵝山道及大老坳上東洋山。
大帽山（中級）
大帽山作為全港最高嘅山，都係一個非常熱門嘅賞芒地點，欣賞日落時發出金黃光茫嘅芒草，又是另一番體驗。相比大東山，大帽山會更易攻頂，交通也更方便。
前往方式：
於荃灣西鐵站乘51號巴士至郊野公園。
大東山（高級）
大東山海拔高度869米高，是全香港第三高的山峰。一入秋，大東山芒草盛開到整個山頭都染成金黃色，景色十分醉人，每年都吸引咗大批遊人賞芒。除了賞芒外，大東山亦是欣賞日落嘅最佳地方，故英文名稱為「Sunset Peak」。
前往方法：
於東涌站B出口附近乘搭3M、11或23號巴士至伯公坳，前行就係大東山入口。
飛鵝山（高級）
飛鵝山係難度偏高嘅賞芒路線，有好多「長命斜」和懸崖，需要手腳並用 ，較為吃力和危險，大家要量力而行，建議行開山或者身手敏捷嘅朋友先好嘗試。飛鵝山沿途有唔少芒草，登上山頂之後仲可以飽覽整個九龍同西貢嘅景色！有車人士可以直接揸上飛鵝山觀景台，慳返唔少腳骨力！
前往方法：
於彩虹地鐵站乘搭1號或1A小巴至飛鵝山道。
大家要根據自己嘅能力去選擇路線呀，快啲約埋Friend子一齊去行山賞芒草啦～不過為人為己，行山記得帶走垃圾，愛護環境呀！
