2020秋冬美甲4大流行趨勢款介紹

除咗衫褲鞋要換季，指甲都係時候要換啦，今年秋冬美甲除咗一如既往流行嘅奶茶、大地色，今年延伸出4個必不可少嘅流行元素，睇下你最鍾意邊款？

趨勢一：琥珀紋美甲

今年日本秋冬超興琥珀紋美甲，咖色與秋冬顏色相呼應，給予人一種成熟溫柔嘅氣質。琥珀美甲利用棕色相似色打造出琥珀般嘅紋理，如果鍾意簡單唔張揚嘅款式，可以將琥珀色穿插於幾隻素面嘅同色系。

趨勢二：法式珍珠美甲

睇厭咗法式美甲？呢款法式珍珠美甲以細緻嘅小珍珠作點綴，令指甲望落別樹一格，簡約而不失質感，盡顯歐洲法式浪漫風情。

趨勢三：簡約動物紋

動物紋係今年秋冬時裝流行元素之一，想跟上潮流又唔想咁高調可以選擇將動物紋展現喺美甲上，今年較流行低調「局部圖紋」、「簡約動物紋」，搭配法式、或單指跳色款嘅設計，又或者本季最熱門嘅大地色系混搭。比起單色動物紋美甲會更好駕馭，令你嘅整體造型增添搶眼度！

趨勢四：暈染流金美甲

充滿藝術氣息、仿若礦石雲母嘅暈染紋，搭配超具時尚感嘅極光鏡面、金屬元素作局部勾勒，令指尖充滿現代感仙氣。此外，以顏色樣式相互呼應，但雙手不同款式嘅「不對稱造型」亦係本季美甲大趨勢，唔易撞款又百搭，又能充分凸顯獨特個人風格。