細個嗰陣聽到有禮物收都會有萬二分期待。想令到小朋友又驚又喜？計我話梗係送佢地最估唔到嘅禮物。小編呢次就搜羅左4款自己都唔想收到嘅禮物，一齊睇睇啦。

1. 各款練習簿/練字簿

相信小朋友收到練習簿都係媽媽們最高興，但香港小朋友平時學業壓力都好大，係滿心期待嘅一刻收到練習簿，簡直晴天霹靂。小編好記得係10歲生日嗰陣都收到過一本《唐詩三百首》，真係畢生難忘架。
P.S本《唐詩三百首》仲係我床下底收藏住。

2. 震動爬行小蟑螂

呢款蟑螂就厲害啦。平時攞黎嚇人嘅膠蟑螂，只係得個樣。而呢款就唔係咁簡單啦，係識行同識郁架，像真度夠高。我諗小朋友收到一定會嚇到哇哇大叫呀。

3. Jelly Belly 怪味糖

當小朋友滿心歡喜以為有糖食，但點知糖嘅味道一啲都唔甜。相反係充斥一陣洗碗水味、死魚味、鼻屎味、 狗糧味、臭蟲味、嘔吐物味 、壞雞蛋味、就連臭襪味都有。食到真係喊三聲了。

4.Rummikub Word

呢款以「Rummikub 魔力橋數字牌遊戲」伸延出來嘅「Rummikub Word」，遊戲玩法需要將抽到嘅英文字母拼成三個字母以上的單字，最快出完抽翻黎嘅牌就係贏嗰個啦。而玩呢個遊戲嘅致勝之道就係，小朋友需熟讀各組英文生字，識越多越好，重組生字嗰陣就更得心應手，對小朋友黎講簡直係惡夢。

睇完呢4款禮物你又會揀邊款？雖然小朋友收到呢啲禮物嘅時候場面一定會好有趣，但小編建議都要準備份正常嘅禮物，安撫翻佢地小心靈，咁就真係做到又驚又喜啦。