IKEA嘅瑞典美食廊有各種瑞典經典美食和飲品，但當中唔係樣樣都啱香港人口味，小編整合咗美食廊嘅3個好味推介和3個中伏食物，等你下次去IKEA避開陷阱！
【好味推介】
好味推介1：DAIM 脆朱古力杏仁餅 HK$53
Daim百分百係瑞典嘅名朱古力，深受全球人喜愛，外層係絲滑朱古力，內餡係香醇獨特嘅杏仁焦糖，再配上脆脆嘅朱古力小顆粒，未食過就一定要試下！
好味推介2：HUVUDROLL 急凍瑞典肉丸 HK$79
IKEA瑞典肉丸受歡迎程度多年來一直榜上有名，幾乎成為大家去IKEA餐廳必嗌嘅食物之一，所以唔少人會買埋急凍肉丸返屋企自己整。肉丸質感紮實，咬開有肉汁唔會乾憎憎，鹹淡適宜，大細亦適中，配上醬汁會一顆接一顆停唔到口。小編試過用氣炸鍋烹調都好好味架！
好味推介3：ALLEMANSRÄTTEN 急凍薯蓉 HK$29
IKEA薯蓉含82%馬鈴薯，所以每啖薯蓉都有香濃薯仔味。無論係配肉丸或配芝士醃肉去焗，都非常美味。而且烹調方法非常簡單，只需喺平底鑊加熱，亦可加入水或牛奶，令口感更軟滑。
【中伏食物】
中伏食物1：KNÄCKEBRÖD FLERKORN多穀麥脆餅 HK$25
呢隻餅空口食會好乾，乾到好難吞嚥，而且味道有點微苦，雖然穀物餅乾適合減肥，但口感太乾，小編覺得市面上比呢隻好味又健康嘅餅乾多得多，減肥已經好辛苦，無謂再難為自己！
中伏食物2：DRYCK LINGON紅果子果汁 HK$8
呢個果汁採用有機紅果子製作，似乎很健康有益，但味道非常奇怪。如果有喺IKEA餐廳食過瑞士肉丸，咁就一定記得蘸肉丸嘅紫紅色紅果醬，呢支果汁嘅味道就喺紅果醬溝入凍水嘅味道。
中伏食物3：鹹甘草魚仔軟糖
今期雷品之王唔係好多人食過，但試過嘅人都會極之抗拒。IKEA瑞典美食廊有得夾糖，其中「鹹甘草魚仔軟糖」係瑞典口味，外表黑蚊蚊，質感像車軚，味道又鹹又苦，似八角味。有網友出於好奇買黎試，結果擺入口兩秒即刻出黎，並批評「有鐵銹味似垃圾！」、「強烈推介比想輕生既朋友仔」。
大家仲有冇試過其他IKEA超市好味或難食嘅產品呢？
