IKEA嘅傢俱和生活用品已經徹底融入每一個家庭，其平靚正嘅特性成為大眾購買家庭用品嘅首選。不過IKEA唔一定全部都係好嘢，都會有一啲「平嘢冇好嘢」嘅產品。一齊睇睇IKEA有邊啲好物和雷物啦！

【好物】

BEVARA封口夾 HK$14.9

呢個封口夾便於封存粉質或細碎嘅食物，只要打開蓋就可以輕易倒出，唔會倒到周圍都係，尤其大家依家鍾意留喺屋企整甜品，啲麵粉用呢個封口夾封住就再好不過！不過IKEA依家已經賣到斷貨，證明真係好好用！

BÄSTIS除塵轆 HK$9.9

IKEA除塵轆大家應該唔陌生，CP值好高，粘力夠強，可以輕鬆清除灰塵，但除塵轆冇套收納，小編覺得存放唔太方便。

RÅSKOG活動几 HK$299.9

簡約嘅外型與開放式分層嘅收納設計，放於家中即刻變得高質感，廣受小資族喜愛，雖然價錢較貴，但無論係浴室、廚房或梳妝空間都好好用，而且質量夠好。

【雷物】

TISKEN吸盤式掛鉤 HK$19.9/2 件

呢個掛鉤吸力好弱，只能掛一啲好輕嘅物件，否則吸喺牆上冇幾耐就會跌落黎。

LENNART抽屜組合 HK$149

抽屜組合嘅通透設計好北歐簡約風，小編當初都被佢嘅顏值和價格所欺騙，用耐咗之後櫃桶嘅軌道好容易變形，導致櫃桶唔好拉出和推入。另外，抽屜組合只有後面兩個滾輪，當櫃桶裝滿嘢嘅時候，想將抽屜組合移動到其他地方就好困難。

IDEALISK刨磨器 HK$29.9

全民狂踩嘅雷中王者就係呢個刨磨器！刨出黎嘅蔬菜絲非常薄，無口感更毫無美觀可言。直立式設計好容易刨到手，而且唔係普通戒傷，而係刨走一塊肉！非常血腥恐怖。密閉式嘅設計唔方便清洗，除非伸手出去，但小編就奉勸大家唔好咁做了，以免血流成河……

以上好物和雷物你又有冇買過呢？