電髮捧對女人黎講都好重要架！不論係卷前陰定髮尾，唔同嘅彎度都好，都要用電髮捧幫手造型！而一枝好嘅電髮捧仲可以盡量減低對頭髮嘅傷害，令你容光煥「髮」！小資女未必想洗咁多錢買dyson同ghd呢類雖然效果非常專業但價錢貴嘅牌子，等小編幫大家收集下好用又平價嘅選擇啦！

1.Laviel 捲髮捧 34mm

呢款電髮捧係由人氣Salon MINX自行研發，有2個捲度，分別係34mm同38mm，溫度可以由100度至200 度（11個段），只要60秒就可以上升至180度，LED屏幕仲會顯示住溫度，方便用家！同埋呢款大頭蝦都可以用架，因為佢開機30分鐘後就自動關機。同埋佢支援海外嘅電壓，就算去旅行用都好方便！價錢都好相宜， 只需¥6,723（約HK$514.5）。

2.SALONIA 直髮曲捲髮兩用 32 mm

鍾意用日本牌子嘅都應該會聽過呢一個牌子，佢哋直髮夾好出名，呢款都係幾吸引架，因為佢都直髮同曲髮兩用嘅！最高溫度可以高達220度，都有30分鐘自動關機功能，非常貼心。髮根夾直，髮尾夾卷，方便本身有啲自然卷嘅女士！佢嘅電壓係100至240V，係世界各地都用得，但佢嘅插頭係日本插頭，所以要係香港用就要用轉插器啦，價錢係¥3,278（約HK$241.8）。

3.VIDAL SASSOON 乾濕兩用電氣石陶瓷捲髮器 32mm

VS都可以話係髮型用品嘅專業牌子，無論定型用品或者係洗頭水都已經係家傳戶曉！VS嘅捲髮器同樣係保持水準，呢款捲髮器用電氣石陶瓷捲，減少毛躁，增加頭髮光澤。仲係乾濕都用得，因為用排氣孔將蒸氣排走，同樣都係可以直髮曲髮兩用，有25段溫度調較，方便唔同造型使用，另外頂端有不導熱嘅保護層，唔會燙傷塊面！價錢HK$258。

4.mod’s hair 卷髮捧 25mm/32mm

mod’s hair都係日本牌子黎架，呢款係佢地9月先出嘅新品，有25mm同32mm可以選擇，體型細細，方便使用同拎去旅行用，功能都唔差，有三段溫度可以選擇，包括140度/180度/200度三段溫度，開機30秒已經可以去到100度，光澤塗層令耐用度增加，而且可以減少頭髮同卷髮捧嘅摩擦，呢款都係可以拎去世界各地用，因為佢有送一個收納袋，電壓仲係由100V去到240V，但都要自備轉插架！價錢係¥4,500（約HK$332），注意係未加稅架。

5.Nobby by TESCOM 環球電壓負離子蒸氣直髮捲髮器

呢款曲髮夾真係高貴得黎又實用！外觀有金色手柄同捲髮板有花型洞，少女感十足！平板可以25秒高速加熱，有9點釋出負離子，係造型嘅時侯包圍頭髮，仲有水箱可以放蒸氣，增加捲曲度！另外，係面板上面嘅陶瓷塗層可以減低頭髮因造型過程中折斷同燙傷嘅機會！發熱板可以由100度去到200度，電壓都可以由100V去到240V，全球可用，方便攜帶。價錢係HK$498，CP值頗高！

小編都想手返一支高CP值嘅卷髮捧去年尾聚會！