超科幻未來機艙！座位自動消毒、自帶無線叉電

因為疫情小編已經整年冇搭過飛機，甚是懷念喺空中穿梭嘅感覺。不過病菌非常容易喺機艙內傳播，今次疫情改變咗全世界旅人嘅飛機乘坐行為與觀感。英國公司PriestmanGoode宣布已設計出未來機艙，結合最新科技，著重旅客嘅個人空間及衞生，搭飛機就如置身科幻片一樣。小編更加期待未來旅行搭飛機嘅體驗啦！

PriestmanGoode最新嘅航空設計計劃「Pure Skies」中，針對經濟艙及商務艙過於壓迫擁擠嘅環境進行重新設計，運用咗新穎嘅設計元素，利用先進嘅科技與創新面料，降底乘客對於封閉式空間嘅焦慮感和人與人接觸嘅頻率，以重建大家對「搭飛機」嘅信心，同時亦增加咗個人活動空間，滿足未來乘客搭乘飛機嘅需求。

未來機艙分為Pure Skies Zones（經濟艙）及Pure Skies Rooms（商務艙）。機艙座位使用UVC（紫外線）嘅光和熱來清潔機艙，座位織物表面上嘅色彩會對其產生反應，隨住座位面料變色，乘客可以知道座位已被清潔消毒。

Pure Skies Zones（經濟艙）使用交錯式2+1座位，單行俠及情侶都適合，亦可加大個人空間。每一行都有分隔屏去分開旅客，減少飛沬傳播。座位捨棄傳統固定式屏幕，鼓勵旅客攜帶個人視聽裝置上機，並設有無線充電器，進而減少油嘅消耗與排放，降低對地球嘅污染。

而Pure Skies Rooms（商務艙）每個座位都好似一個迷你房間咁，有屬於自己嘅小世界。座位表面則嵌入了抗菌材質織物，減少細菌的附著。有拉簾保持私隱度，旅客能自己控制燈光及冷熱系統，還有一個衣櫃及置頂行李儲存空間。為咗減少旅客與電視娛樂系統螢幕嘅接觸，取而代之嘅係可與旅客嘅電子裝置同步播放嘅IFE系統，用手勢操作，大幅降低交叉感染的機率。