台灣乾拌麵嘅熱潮早前吹至香港，好多人都有開箱試食。買嘢學小編今次為大家帶黎不一樣嘅台灣麵開箱試食！小編挑選咗4款非常有特色嘅台灣麵食，分別係牛肉麵、芫茜拌麵、蚵仔麵線和泰式酸辣粉。為大家逐一送上食評！

1. 阿舍食堂 – 究濃紅燒牛肉麵

講到台灣麵食，點少的招牌紅燒牛肉麵！阿舍食堂嘅「究濃紅燒牛肉麵」廣受好評，網民稱讚佢分量十足、即食牛肉肉質軟嫩。小編試食後認為，牛肉數量算多但唔夠大塊，口感偏韌，肉汁較少。紅燒湯頭帶有BB辣，味道正正常常，唔算好好味。至於波浪麵亦屬普通，冇包裝所寫嘅Q彈口感。

整體評分：4/10

阿舍食堂 – 究濃紅燒牛肉麵（圖：小編實拍）

2. 香菜先生 – 芫茜拌麵（椒麻味）

小編作為芫茜控，對呢款拌面有非常高嘅期待值。麵條以芫荽製成，仲有芫荽碎可以提升芫荽香味。但小編試食之後大感失望，因為麵條毫無芫荽味！即使反覆咀嚼，甚至食到「懷疑人生」都食唔出任何芫荽味。整碗麵只食到椒麻油嘅微辣味，辣度就如譚仔十少少辣，芫荽碎嘅提味作用等於零。小編真係好傷心，建議大家都係買返普通台灣拌麵會好味得多。

整體評分：2/10

香菜先生 – 芫茜拌麵（椒麻味）（圖：小編實拍）

3. 古早 – 蚵仔風味麵線

台灣夜市必食嘅蚵仔麵線在家都可以自己整到！經過頭兩碗麵嘅失望之後，小編覺得呢個蚵仔麵線非常有驚喜，真係有正宗台灣蚵仔麵線嘅味道，瞬間好似置身台灣夜市，而且香氣撲鼻，麵線夠多，小編食到停唔到口，建議可以加入芫茜或者豬大腸等配料，口感層次會更加豐富。呢個蚵仔風味麵線約十幾蚊港紙，可以煮到三至四人份量，圖片中嘅份量只係其中一半，真係超級抵，絕對會回購！

整體評分：9/10

古早 – 蚵仔風味麵線（圖：小編實拍）

4. 賈以食日 – 泰式酸辣粉

賈以食日由金鐘影后賈靜雯一手創辦，近期喺台灣極速冒起，人氣Hit爆兼大賣。泰式酸辣粉係其品牌首個異國料理，賈靜雯本人大推，所以小編買咗盒黎試食。呢個酸辣粉配以台式細寬粉，但小編覺得個寬粉太幼，所以入口質感嚼勁唔夠強，如果喜歡吃台灣麻辣鴨血寬粉嘅話，呢款細寬粉嘅口感就會遜色得多。酸辣湯底望落好似好辣，但辣度其實一般般，酸味比辣味更強烈，而且有少許椰香味。整體黎講味道算惹味開胃，但稱唔上正宗泰國味道。

整體評分：7/10

賈以食日 – 泰式酸辣粉（圖：小編實拍）

總括而言，小編最推介大家買蚵仔風味麵線，其次就泰式酸辣粉，但其他兩碗麵就不必浪費金錢中伏了。