【小資女系列】5款超值得入手高CP小白鞋合集

小白鞋作為永恆的時尚，唔少人買白色帆布鞋都會揀Vans或者Converse，導致遍大街都係同款。小編為大家推介5款性價比高且舒服嘅小白鞋，保證你唔會後悔入手！

無印良品撥水加工有機棉束繩便服鞋

無印良品嘅隱藏好物之一就係小白鞋，小編已經著過兩對啦，平、靚、正，非常推介！設計簡約，採用有機棉撥水加工處理，唔易沾染水漬，所以無需擔心小白鞋好快變小黑鞋。此外，無印良品小白鞋內有按摩鞋墊，採用可支撐腳底足弓嘅設計，走路時更舒適自在。無印良品呢對舒服百搭且禁著嘅小白鞋以為好貴？其實只售HK$180，性價比超高的，絕對適合買黎粗著。

Keds The Champion

美國家喻戶曉嘅小白鞋品牌Keds，其經典鞋款「The Champion」以一對綁繩白色帆布鞋配上一個微小藍色商標，於小白鞋界屹立不倒。以前一眾國際級網球冠軍、奧運足球選手及專業運動常穿Keds，後來品牌逐漸年輕化，搵來Taylor Swift、f(x)成員Krystal做代言人，便越來越受年輕女生青睞，小編亦是其中一份子，在遇到無印良品小白鞋之前，小編一直著緊Keds，小巧百搭，而且夠透氣！Keds「The Champion」除咗經典白色，有時亦會加入唔同女性元素，例如亮片、蕾絲等。大家可於Keds香港Facebook商店購買，售價為HK$440。不過經小編比較，發現Keds台灣官網價格較為便宜，售價為NT$1,222，約HK$330，大家可考慮於台灣官網買。

EXCELSIOR曲奇鞋

EXCELSIOR早前大熱嘅曲奇鞋，鞋邊粗褶壓紋望落好似曲奇餅乾，以復古工業風火速爆紅。EXCELSIOR雖然係法國牌子，但其實佢係由韓國設計師設計，所以有強烈嘅韓式小清新風格，唔少韓劇都可以見到曲奇鞋嘅蹤影。EXCELSIOR嘅小白鞋亦係好多人嘅選擇，仲有低筒與高筒可揀，就連楊丞琳都係曲奇鞋嘅fans！不過最近EXCELSIOR最近推出咗兩款台灣限定款：「LOVE」和「PEACE」，於鞋邊加上一條紅色/黑色線條，為單調嘅白色添上一點色彩，好適合做情侶鞋！唔知香港會唔會有呢。

EXCELSIOR 「LOVE」和「PEACE」嘅售價皆為HK$868.77，經典白色則為HK$762.83，可於EXCELSIOR官網購買。

Superga Cout Classic

有「意大利國民鞋」之稱嘅Superga，更係英國王妃凱特「御用」嘅小白鞋，佢唔少戶外活動都會著上Superga小白鞋。Superga防滑力強、耐磨性能非常優秀，唔易爆出裂口。Cout Classic同樣係帆布鞋身，膠鞋底，並有數條車線設計，和一個Logo標籤，設計中性，且不花巧，經典款不單受王妃喜歡，Emma Watson、Kendall Jenner等人都好鐘意呢個品牌Superga香港官網售價為HK$458。

Camper Courb

西班牙品牌Camper大家可能會比較少接觸，Courb係Camper今年推出嘅其中一款小白鞋，雖然價格會較前面4款略貴，但其外觀中性、極簡，喺經典與前衛之間達到完美嘅平衡，搭配輕量科技和彈性結構嘅支撐，Courb絕對係既舒服又小眾嘅一對好鞋，若果資金夠鬆動又唔想同人撞款，不妨考慮下入手呢對Courb，可於Camper官網購買，售價為US$136，約HK$1,064。